Jigarthanda DoubleX Telugu Movie Review

దర్శకుడు కార్తీక్ సుబ్బరాజు కి మంచి దర్శకుడు అన్న పేరుంది. అతని సినిమాల కోసం ఎదురు చూసే ప్రేక్షకులు కూడా వున్నారు. అతను ఇంతకు ముందు తీసిన తీసిన ‘జిగర్ తండా’ సినిమా పెద్ద విజయం సాధించింది, దానికి ఈ ‘జిగర్ తండా డబుల్ ఎక్స్’ సీక్వెల్ గా వచ్చింది. ‘జిగర్ తండా’ లో డాక్యుమెంటరీలు తీసే అతను దర్శకుడుగా అవ్వాలని, ఒక రౌడీ నేపధ్యం వున్న సినిమా చెయ్యాలని అనుకుంటాడు. ఇందులో ఒక రౌడీ ని చంపడానికి దర్శకుడిగా అవతారం ఎత్తి ఆ రౌడీ గురించి సినిమా చెయ్యాలని అనుకుంటూ ఉంటాడు. రౌడీని చంపడమే ప్రధాన ఉద్దేశంగా దర్శకుడిగా వచ్చి, అతని బయోపిక్ మొదలెట్టి, చివరికి ఆ సినిమా ఎక్కడికి దారితీసింది అనేదే ఈ ‘జిగర్ తండా డబుల్ ఎక్స్’ ప్రధానమైన కథ. దర్శకుడు కార్తిక్ సుబ్బరాజు సినిమా మాధ్యమం అనేది ఎంత బలమైనదో ఈ రెండు సినిమాల ద్వారా చెపుతాడు.

‘జిగర్ తండా డబుల్ ఎక్స్’ లో కార్తీక్ సుబ్బరాజు 1973 నాటి కథని ఎంచుకున్నాడు. నలుపురంగు వున్నవాడు హీరో ఎలా అవుతాడు అని సీజర్ అనేవాడిని ఎగతాళి చేస్తే, దానికి అతను చేసి చూపిస్తా అని అంటాడు. అప్పటికి రజనీకాంత్ ఇంకా హీరోగా ఎదగలేదు, అందుకని అప్పటి కథ ఎంచుకున్నాడు అనిపిస్తోంది. మొదటి సగం అంతా సూర్య, రాఘవ లారెన్స్ మధ్య చిన్న చిన్న సంఘటనలు, రాఘవ లారెన్స్ ఎలాంటి రౌడీ అనే విషయాలమీద ఉంటుంది. రెండో సగం రౌడీ కుటుంబం వేపు కథ ఉంటుంది, అది అడవికి తీసుకు వెళుతుంది, ఆదివాసుల గురించి చెప్తుంది. కార్తీక్ సుబ్బరాజు సినిమాల్లో కొంచెం సామాజిక అంశాలు కూడా ఉంటాయి. అడవులు, ప్రకృతి, అడవిలో జంతువులు, అడవిలో నివసించే ప్రజలు వారి పరిస్థితి ఇవనీ రెండో సగంలో ఉంటాయి. అయితే రెండో సగం అంతా కొంచెం భావోద్వేగంగా ఉంటుంది. మొదటి సగం అంతా వినోదాతాత్మకంగా ఉంటుంది. రెండో సగం కొంచెం డాక్యుమెంటరీ లా ఉంటుంది. తమిళ ప్రేక్షకులకి ఈ సినిమా నచ్చుతుందేమో కానీ, తెలుగు ప్రేక్షకులకి మాత్రం ఇది అంతగా నచ్చకపోవచ్చు.